"e-Darslik" мобил дастури


ZiyoNET Ресурс маркази умумтаълим дарсликларини (ўзбек, рус, қорақалпоқ ва тожик тилларида) мобил телефонларда ва планшетларда ўқиш имкониятини берувчи «e-Darslik» мобил дастурининг ишга туширилганлигини маълум қилади.

Мобил дастурда дарсликлар кутубхонаси мавжуд бўлиб (бугунги кунда 60 дан ортиқ дарсликлар), фойдаланувчи уларни ўзининг “китоб жавонига”, яъни қурилманинг “Менинг китобларим” бўлимига юклаб олиши мумкин. Дарсликларни қидириш учун дарсликнинг қайси тилда, қайси фан ва синфга тегишли эканлигини танлаш имкониятини берувчи махсус фильтрдан фойдаланиш мумкин.

Керакли дарсликлар танлангандан сўнг, улар телефон ёки планшетга юклаб олинади. Ушбу жараён амалга оширилгандан кейин эса, дарсликлардан Интернет тармоғига уланмасдан туриб фойдаланиш мумкин бўлади.

Ҳар бир дарслик аннотация ва интерактив мундарижага эга. Шунингдек, китобни ўқишни тугаган жойдан давом эттириш учун махсус хатчўп ўрнатиш мумкин.

Ҳар бир банд сўнгида тақдим этилган материаллар қай даражада ўзлаштирилганлигини текшириш имконини берувчи тест синовлари тақдим этилади. Тестларни баҳолаш дарслик таркибига киритилган дастур ёрдамида амалга оширилади, бу жараён Интернетга уланишни талаб этмайди.

Дарсликлар ҳажми матн ва тасвирларнинг кўплигига боғлиқ бўлиб, 2 дан 50 МБ гача бўлиши мумкин. Трафикни тежаш ва юклаб олиш тезлигини кўпайтириш мақсадида дарсликлар архивланган ҳолатда юклаб олинади.

Мобил дастур бета-тест тартибида ишга тушурилган бўлиб, "e-Darslik" электрон дарсликлари дастурида қайд этилган камчиликлар ва уни ривожлантириш бўйича ўз таклифларингизни ZiyoNET порталининг қайта алоқаси орқали жўнатишингизни сўраймиз.

Android платформали қурилмалар учун дастурнинг тест талқинини сервердан юклаб олиш

 Тез кунларда

Хато тўғрисида маълум қилиш Транслит